Премиерот Мицкоски вчера од првиот ред ги слушна пораките на лидерот на босанските Срби, а денеска се огради од истите. Додик без напишан говор, а покрај празничната честитка, зборуваше и анти-НАТО и анти-ЕУ. Овие пораки, според претседателот на Владата се злоупотреба на настанот.
Тој вчера говореше веднаш после Додик, осврнувајќи се на евроинтеграциите на Македонија и Србија и споделените вредности на европскиот пат, без директно да одговори на политичките пораки на претходниот говорник.
„Во делот на содржината на говорот којшто се однесува на анти-ЕУ, анти-НАТО и слично јас категорично го отфрлам и апсолутно не се сложувам. Навистина не очекував дека ќе го злоупотреби тој настан за испраќање на такви пораки бидејќи тоа сепак беше свечена академија, а не место каде што ваков тип на политички пораки“, изјави премиерот Христијан Мицкоски.
Претседателот на Република Српска вчера ѝ се заблагодари на Македонија што овозможила чествување на празникот Свети Сава – националниот ден на Србите во земјава. Потоа го спомена геноцидот и кажа дека такво нешто не постои и дека тоа е лага.
Потоа, Додик се осврна на Европската унија и изрази сомнеж од потребата за евроинтеграции. Ги искритикува и НАТО и САД.
Инаку, лидерот на босанските Срби е на „Црната листа“ на Соединетите американски држави пред речиси една деценија.
„Ние сме на европскиот пат. Но, гледаме дека токму таа Европа најмногу се посрамоти на Македонија која направи многу отстапки, а малку доби од Европа. Мораме еден ден да застанеме и да размислиме добро дали треба да продолжиме по тој пат“, порача Милорад Додик, претседател на Република Српска.
Посетата на Додик и неговото присуство на свечениот настан вчера, наиде на критика и од страна на опозициските партии од албанскиот блок.
Од ДУИ оценуваат дека чинот ги премина сите граници на моралот, а секој граѓанин со достоинство вчера бил понижен, навреден и предаден.
„Беше пречекан и почестен Милорад Додик – продолжената рака на Владимир Путин, човекот кој работи за поделба на Босна и Херцеговина и човекот кој го величи нечовечниот масакр во Сребреница. Како е можно човек изолиран од демократскиот свет кој шири поделби и омраза да биде официјално пречека од Влада која тврди дека ги претставува евроатлатнските вредности и меѓуетничкиот мир“, рече Дијана Тоска од ДУИ.
На вчерашната Свечена Светосавска академија покрај политички пораки, беа испратени и повици за единство. Централни фигури помеѓу сите високи претставници беа српскиот патријарх Порфириј и архиепископот Охридски и Македонски, Господин Господин Стефан.
Двајцата дојдоа заедно, а пред присутните во МНТ се обрати само поглаварот на СПЦ. Нема официјални информации дали тие двајца одржале средба, ниту пак дали станало збор и за патот на МПЦ-ОА кон целосна и потполна автокефалност во православниот свет, откако СПЦ го даде томосот пред три години.
Петар Догов