Прашањата и одговорите покрај тоа што се основа на љубопитноста може да помогнат при согледување дали некоја содржина е вистинска или лажна.
Основните прашања се однесуваат на времето, местото и начинот на објавување на определена содржина (информација, фотографија, видео или слично).
Локација: Дали фотографијата ја прикажува локацијата за која изворот тврди дека ја покажува?
Доколку на пример се тврди дека нешто се случува во Скопје, а на определена фотографија или видео се гледаат натписи на јазик несоодветен и неупотребуван во Скопје (на пример на кинески или на некој африкански јазик) тогаш со сигурност може да се оспори вистинитоста на таа содржина/фотографија. Пример: фотографија со сиромашен ученик од Турција кој беше претставен како ученик од Македонија, а содржината беше употребена во политичко-партиски цели за оспорување на актуелни образовни реформи.
Време: Дали видеото или фотографијата кореспондира со датумот и времето за кое се бара?
Ако се зборува дека на пример сега среде лето нешто е забележано, а на таа содржина има фотографија која прикажува луѓе облечени за друг временски период тогаш со сигурност може да се оспори вистинитоста на таа содржина/фотографија.
Извор: Дали е потврден идентитетот и авторството на изворот?
Некогаш фотографија или содржина е објавена како да е направена од оној што ја објавува, но доколку таа не коренспондира со можностите на лажниот автор за присуство на терен/град/држава за која се однесува содржината тогаш со сигурност може да се оспори вистинитоста на таа содржина/фотографија.
Објавување: Дали фотографијата или видеото е објавено или е ексклузивно?
Доста често се случува да се прикаже стара фотографија како да е направена во периодот на објавување на содржината. Но, многу брзо со проверка на името на фотографијата или на содржината на фотографијата може да се провери и да се утврди неесклузивноста на таа содржина (односно реобјавување) без тоа да се посочи, што е основна алатка при новинарската работа. Тогаш со сигурност може да се оспори вистинитоста на таа содржина/фотографија.
