Началникот на Генералштабот на белоруските вооружени сили Виктор Гулевич изјави дека Белорусија не планира да се приклучи на руската инвазија на Украина, но испраќа пет баталјонски тактички групи (БТГ) на својата граница на ротација за да ги заменат силите што веќе се стационирани таму.
Во петокот, висок функционер за безбедност на Украина ја предупреди Белорусија да не испраќа војници во Украина поради страв дека Белорусија планира да им се приклучи на руските вооружени сили. Гулевич денеска ги негираше плановите за инвазија на Украина:
„Сакам да нагласам дека трансферот на војници на никаков начин не е поврзан со (никаква) подготовка, а особено не со учество на белоруски војници во специјална воена операција на територијата на Украина“, рече тој.
Украина вчера ги обвини руските авиони дека од украинскиот воздушен простор пукале врз белоруските погранични села за да обезбедат изговор за офанзивата. Наводните напади се случија кога белорускиот лидер Александар Лукашенко се сретна со рускиот претседател Владимир Путин во Москва.