На вчерашниот референдум во Белорусија беше одобрен нов устав со кој се откажува од ненуклеарниот статус, во време кога поранешната советска република стана почетна точка за инвазијата на руските трупи во Украина, пренесоа руските агенции.
Агенциите ја цитираа белоруската Централна изборна комисија која објави дека 65,2 отсто од оние кои гласале гласале ЗА. Ваквиот резултат беше очекуван со оглед на строго контролираното владеење на претседателот Александар Лукашенко.
Новиот устав дозволува нуклеарно оружје на белоруска територија за прв пат откако земјата се откажа од него по распадот на Советскиот Сојуз.
Западот претходно најави дека нема да ги признае резултатите од референдумот, кој се одржува поради општата пресметка со белоруската опозиција и противниците на режимот на Лукашенко. Според активистите за човекови права, во Белорусија во моментов има повеќе од илјада политички затвореници.
Референдумот предизвика антивоени протести во неколку градови. Најмалку 290 лица се приведени, соопштија активисти за човекови права.
Масовните протести избија во 2020 година по спорните избори за кои опозицијата тврди дека биле наместени. Откако Лукашенко започна насилна акција против демонстрантите, демонстрациите во голема мера стивнаа.
Зборувајќи на избирачко место во неделата, Лукашенко рече дека може да побара од Русија да и го врати нуклеарното оружје на Белорусија.
„Ако (Западот) пренесе нуклеарно оружје во Полска или Литванија, до нашите граници, тогаш ќе му се обратам на Путин да го врати нуклеарното оружје што го дадов без никакви услови“, рече Лукашенко.
По протестите во 2020 година, Лукашенко се сврте кон Москва, обезбедувајќи руски заеми со кои се обиде да го компензира негативниот ефект од западните санкции.
Неговиот ривал на изборите во 2020 година, пребегнатата опозициска лидерка Светлана Тихановска, ги повика Белорусите да го искористат гласањето за да протестираат против руската инвазија на соседна Украина.
На снимките и фотографиите објавени на социјалните мрежи, луѓето се собраа на избирачките места во Минск и другите градови за да протестираат.
Новиот устав ги дава сите овластувања на Белоруското национално собрание, кое се состои од партиски лојалисти на Лукашенко, локални советници, функционери и членови на провладини активистички организации. Уставот, исто така, му обезбедува на претседателот доживотен имунитет од кривично гонење.