Повеќе од 5 часа откако доби медицинско изземање од задолжителната вакцинација против Ковид -19 и слета во Мелбурн, најдобриот тенисер на планетата, Новак Ѓоковиќ, се уште не може да ја помине граничната контрола.
Новак и неговиот тим , длабоко во ноќта и натаму не можат да ја поминат граничната контрола затоа што наводно еден од луѓето кои патувааат со него, доставил барање за „погрешен тип на виза“. Целиот случај доби и политички димензии и прерасна во конфликт меѓу владата на државата Викторија и федералната влада, предводена од премиерот на Австралија Скот Морисон. Дури откако заврши сложената процедура и анонимното барање на најдобриот светски тенисер беше одобрено од страна на две стручни комисии, по лавината реакции на социјалните мрежи, Морисон изјави дека неговата влада може и да го врати Ѓоковиќ назад.
Дали навистина тимот на Ѓоковиќ, кој по 18-ти пат во кариерата треба да учествува на Отвореното првенство на Австралија во тенис, се уште не знае да пополни барање за виза или пак станува збор за политичка игра во која најдобриот играч на планетата се користи како тениско топче во конфликтот меѓу владата на Викторија и федералната власт, останува да видиме.