Ден по заедничкото гласање за економските мерки, власта и опозицијата ги зацврстуваат спротивставените политички па и правни позиции. Додека ВМРО ДПМНЕ бара кривична одговорност, спикерот Талат Џафери вели дека негова обврска е да обезбеди функционално Собрание и при тоа да ги искористи сите расположиви инструменти.
Меѓу нив, и протоколот подготвен од посебна работна група предводена од генералниот секретар Цветанка Иванова во јули, а дополнет во ноември минатата година. Вчерашниот потег го смета за неопходен во услови кога опозицијата одбива да ги извршува своите пратенички задачи – да присуствува на седници и на гласање.
ВМРО ДПМНЕ се чуди која е потребата од вакво покажување сила. За нив, ова се сведува на биолошки тероризам.
СДСМ не сака ова да стане пракса, но во овој случај го смета за оправдат потег поради ризикот повторно да нема кворум за гласање.
По неколку одложувања, вчера беа усвоени економските мерки за помош на граѓани и на правни лица оштетени од кризата. Гласаа и двајца пратеници од мнозинството, кои дојдоа во скафандери бидејќи се позитивни на ковид. Ваков протокол прв пат беше применет при изборот на Владата.
Соња Николовска