Само 0,12 индексни поени ја делат Македонија од групата „слаби демократии“ во Извештајот на угледниот Економист. Со своите 5,89 поени, рангирана е во групата земји со хибриден режим. Во истото „друштво“ се Бангладеш, Ел Салвадор, Украина, Танзанија, Боливија, Кенија, Црна Гора, Турција, Босна и Херцеговина и други. Подобро рангирани се сите наши соседи: Албанија со 6,08, Србија со 6,22, Бугарија 6,71 и Грција со 7,39. Листата за 2020-та година ја предводат демократските земји Норвешка со 9,81 и Исланд со 9,37, а ја завршуваат авторитарните земји Северна Кореја со 1,08 и Конго со 1,13.
„Економист“ дава оценки во неколку категории. Македонија најдобро стои во категоријата „изборни процеси и плурализам“, каде добила индекс 7,42, како и во „граѓански слободи“ со оценка 7,06, а најслаба оценка од 3,13 има за „политичка култура“.
Во ваквите параметри владеачката СДСМ гледа пофалби поради „начинот на кој беа организирани и спроведени изборите, што е значаен успех со оглед на здравствената криза“.
Две години по ред државата бележеше напредок откако претходно 10 години паѓаше, а 2020-та се воочени благи негативни моменти кои се должат на две причини: рестрикции во време на пандемија и поради немање напредок во политичката култура, што главно се должи на лажни вести, политички радикализам, самовластие и неказнивост за кои што има и јавно познати виновници. Свежи се сеќавањата како се однесуваа Наќе Чулев и Христијан Мицкоски.
„Со Владата на Заев, Македонија и официјално е хрибриден режим, најкорумпиран во Европа, возврати ВМРО ДПМНЕ.
Заев ветуваше иднина во Европа, а не може да мрдне од Африка. Ветуваше живот, а стана рекордер по мизерија. Ветуваа правда, останавме заковани во хибриден режим…Според Индексот на демократија, на ранг листата на Економист не сме напреднале, споредено со минатата година. Дијагнозата е мафија, одговорот мора да е народот!
Минатата година, Македонија исто така беше меѓу земјите со хибриден режим, со минимално подобра оценка од 0,08 индексни поени. Најдобра оценка сме имале во 2006-та со средна оценка од 6,33. Оваа недела, Македонија беше лошо рангирана и од Транспаренси интернешнл: според индексот на корупција, падна на 111-тото место, во друштво со Монголија и со Панама.
Соња Николовска