Чешка сака компромис по прашањето на стартот на преговорите на Европската унија со Македонија и според неа неносењето одлука за старт на преговорите од страна на Европскиот совет минатата недела, е многу непријатен неуспех. Ова денеска го соопшти чешкиот министер за надворешни работи, Томаш Петричек, според кого одржувањето на меѓувладината конференција многу ќе зависи од утрешниот исход на состаноот на амбасадорско ниво на земјите-членки.
„Чешката Република многу ги поддржува напорите на претседателството на Германија во тоа да се постигне спогодба и Бугарија да се откаже, на некој начин, од своите барања и да се стигне до компромис. Се надевам дека меѓувладината конференција би можела да започне наредната година, но навистина тоа ќе зависи од утрешната дискусија“, изјави Томаш Петричек, министер за надвошрени работи на Чешката република.
Според Петричек прашањата за националниот идентитет се многу битни и тешки. Притоа тој потсети на чешко-германското искуство околу решавањето на болните историски прашања, при што рече дека тоа било надминато со помош на историчарите и граѓанскиот сектор и понуди споделување на чешкото искуство со македонските и бугарските колеги.
Првиот човек на македонската дипломатија, Бујар Османи пред утрешната расправа на амбасадорско ниво за заклучоците на ЕУ околу процесот на проширување, од своја страна изрази надеж дека нема да дојде до билатерализација на овој процес. Притоа рече дека е тоа принципиелен став на 26-земји членки и тоа не само во контекст на Македонија, туку и за целиот преговарачки процес.
„Европскиот процес не треба да биде заложник на билатерланите прашања, ниту на Северна Македонија, ниту на која било друга земја од Западен Балкан. Особено билатерланите прашања кои се веќе ставени во рамка, се ставени во договор, како што е тој за добрососедски односи со Република Бугарија. Притоа Република Северна Македонија не бега од одговорностите кои ги има преземено сод Договорот, но сметаме дека двата процеса може да се одвиваат паралелно, еден покрај друг“, изјави Османи.
Османи притоа посочи дека од динамиката на пристапниот процес на земјава зависи и спроведувањето на Преспанскиот договор, но и на Договорот со Бугарија.
Тамара Грнчароска