Дали имало пропусти при лекувањето? зошто тимот од медицински сестри не одговарал на повиците на 41 годишната беровачанка Руменка Довичинска, која на штипското Инфективно одделение починала на 14 ноември од компликации од коронавирусот? Oдговори на сите овие прашања и детали околу случајот треба да даде стручниот вонреден надзор на комисијата на Лекарската комора. Од кабинетот на министерот за здравство, Венко Филипче велат дека извештаите од штипската болница и од Државниот здравствен и санитарен инспекторат се добиени, а веќе утринава е побараен вонредниот стручен надзор.
Комисијата на Лекарската комора за колку време ќе го заврши овој случај според законот не е утврдено, но откако ќе го направи извештајот, во тој случај во рок од осум дена треба да го извести министерот за здравство.
Директорката на Државниот здравствен и санитарен инспекторат, Ирина Бухова за Телма вели дека од нивна страна инспекторот ја завршил својата работа.
И директорот на штипската Клиничка болница, Ален Ѓеорѓијев потврдува дека се што е побарано од нивна страна за случајот со починатата пациентка од Берово е доставено до институциите.
Уште еднаш би апелирал да престанат нападите на трудот на медицинските работници, во борбата со ова зло кое го покоси буквално целиот свет.Да ги почитуваме здравствените работници, да ги почитуваме мерките за заштита бидејќи состојбата е и така премногу тешка, вели во соопштението Ален Ѓеорѓијев – директор на КБ ШТИП.
Досега Министерството за здравство до Лекарската комора има испратено вкупно десет случаи за починати пациенти низ болниците во земјава, а денеска се пристиогнати уште два. Станува збор за починати пациенти во Струмица, Свети Николе, Битола, Тетово, Кавадарци и Ресен.
Викторија Димитрова Јованова