Пратеничката група на ВМРО ДПМНЕ имаше координација и одлучи да не ги гласаат одлуките на претседателот Стево Пендаровски, за воведување на вонредна состојба во државата на почетокот од епидемијата со корона вирусот. Сметаат дека одлуките од првата вонредна состојба не вродиле со плод, напротив се влошила ситуацијата и денеска економската состојба е уште полоша. Велат дека Владата со носењето на погрешни уредби ја злоупотребиле вонредната состојба во земјава за предизборни цели и поткуп, како и лошо справување со пандемијата со КОВИД 19.
Претседателот на Собранието, Талат Џафери на утринскиот брифинг рече дека нема да ги става петте точки денеска на гласање, туку само ќе се утврди дневниот ред на седницата. Рече дека ќе ја почека одлуката на партиските тела на ВМРО ДПМНЕ, поради што рече дека не сака да ги става пред свршен чин.