Од мудри мисли на Махатма Ганди цитирани од обвинителката Вилма Русковска па се до пад во бессознание на еден до обвинетите. Така започна судењето за случајот за невладината Меѓународен сојуз на Боки 13. Во воведните зборови обвинителката Русковска раскажуваше како хуманитарната организација “Меѓународен сојуз” била всушност создадена за измами. Нејзиниот претседател и првообвинет Бојан Јовановски успеал да измами двајца бизнисмен Сиљан Мицевски и Адријан Амзовски да му дадат вкупно околу милион евра наводно за проекти за изградба на старечки домови. Наместо таму парите завршиле во неговата БМЈ Груп и 1 ТВ.
Сите петмина обвинети се изјаснија невини дел од нив за измама, за помагање во измама или за перење пари.
Сите баналности во обвинението ги разбирам, но не се чувствувам виновен. Како што обвинителката мене ме етикетира со зборовите девијантно криминален ум, јас нејзиното обвинение ќе го наречам девијантно алкохолизирано, рече Јовановски.
Неговиот адвокат смета дека таргет во обвинението е токму Бојан Јовановски.
Инаку според обвинителството останатите обвинети му помагале на Боки 13 во измамата, а меѓу нив е и поранешната потпретседателка во Собранието и во СДСМ Фросина Ременски. Со угледот и авторитетот му помагала на Јовановски во измамата.
Инаку во обвинението се опфатени и двете помошнички на Бојан Јовановски во меѓународниот сојуз Јасна Ерцеговиќ и Христина Блажевска, како и неговиот татко Миле Јовановски. Тие ги подигале и уплаќале парите од сметката на пензионерката каде биле пуштени, на сметката на медиумот. Но само што Бојан Јовановски започна на табла да ги пишува доказите, за сликовито да го убеди судот во својата невиност, судењето се прекина поради влошената здравствена состојба на неговиот татко.
Билјана Николовска