Опозицијата во Холандија повика на итно распишување предвремени избори, откако крајно десничарската Партија на слободата вчера ја напушти четирипартиската коалиција, предизвикувајќи го падот на владата на помалку од една година по нејзиното формирање.
Герт Вилдерс ја напушти владата откако коалициските партнери одбија да го прифатат неговиот план за воведување исклучително строги мерки за ограничување на миграцијата.
Владата на премиерот Дик Шоф ќе продолжи да ја води земјата како привремена влада, со ограничени овластувања.
„Кога мора да се презеде, кога тешки одлуки мораат да се донесат, г. Вилдерс го нема никаде. Го знаевме тоа, го имаме видено претходно, во 2012 Вилдерс исто така излезе. Погледнете ја Партијата на слободата, ви го има направено тоа и претходно, требаше да имате во предвид дека ќе се случи повторно, а сепак одлучивте да влезете во коалиција со нив. Ги повикувам сите партии во Парламентот, јасно да кажат дека не е во национален интерес да се дозволи на власт да дојде некој што постојано парализира, не нуди решенија и постојано бара конфликт“ изјави Франс Тимерманс – Лидер на Зелено левата коалиција.
Но, политичките аналитичари во Холандија стравуваат дека тоа може да трае со месеци, затоа што предвремените избори, најрано што може да се одржат, е на есен, додека, пак, поделeноста на политичката сцена сугерира дека повторно ќе има долги преговори за нова влада.