Дисциплинската комисија при Фудбалската федерација на Македонија ги суспендираше тренерот и директорот на фудбалскиот клуб Кожув поради сомнителниот натпревар одигра со Башкими во рамки на 28.коло во Втората лига.
Тренерот на Кожув, Славчо Георгиевски и техничкиот директор на клубот, Пепи Георгиев добија забрана за вршење било каква функција во фудбалот во следните две години. Почната е и дисциплинска постапка против Кожув поради прикривање и нерегуларности во врска со натпреварот со Башкими, но постапка има и против кумановскиот состав. Четири играчи на Кожув исто така се на Дисциплинска поради прикривање на информации поврзани со спорниот натпревар.
Овој дуел од 28.коло во Втората лига предизвика лавина од реакции во македонската јавност откако фудбалерите на Кожув речиси застанаа на теренот за Башкими да постигне гол за победа во судиското продолжение. Тимот од Куманово мораше да победи за да ја продолжи битката за влез во Првата лига. Натпреварот официјално беше поништен уште минатата недела иако Башкими победи со 1-2.
Дисциплинската комисија денеска им изрече и доживотни суспензии на претседателот на Охридскиот фудбалски сојуз, Цане Милошески и генералниот секретар Никола Цветкоски поради низа нерегуларности како фалсификување на записници од натпревари што не се ни одиграле и комплетно измислена „Б“ општинска лига во рамки на ОФС Охрид.