Иван Ивановски „Support Kocani” во вечерешната Топ Тема се осврна на проблемите во кочанската болница. И покрај донацијата која успеале да ја набават за болницата во која донеле хипербарна комора која би помогнала на повредените од пожарот, сепак таа стои надвор од употреба.
„Ние од „Support Kocani” однесовме во болницата во Кочани една машина која ќе им помогне на луѓето за заздравување на раните. До ден денес машината уште не е во функција. Нема специјалист што таа машина ќе ја стави во функција“ вели Ивановски.
Тој потенцира дека како што поминува времето се повеќе се заборава и зборува за Кочани. Ивановски додава дека моменталната ситуација во Кочани можеби од страна изгледа дека е под контрола, но тоа е далеку од вистината.
„Последниот период како што можете забележите како да сакаат да не се дискутира толку за Кочани ама затоа ние сме тука од „Support Kocani” и да дискутираме за проблемите кои ги има. Волонтерите секој ден по неколку часа по работа одвојуваме време. Секогаш повторувам и сега ќе повторам ние имаме една главна цел, а тоа е да ги вратиме сите деца кои се во болниците во странство живи и здрави во Кочани, а второ е да им помогнеме и да пружиме помош на останатите кои се веќе во Кочани затоа што моментално не гледаме добра организација. Можеби изгледа дека моменталната ситуација за остатокот од Македонија за Кочани е под контрола, но јас ќе ви кажам дека е многу подалеку од тоа“ објаснува Ивановски.