Празни куќи, половина од нивите напуштени, низ улиците го нема детскиот џагор, како пред три децении. Ваква е сликата во селото Кучичино во Општина Чешиново-Облешево, кое беше живо село, со развиено земјоделство, лозарство и сточарство, но сега во него се останати да живеат само повозрасни жители. Никола Стојанов и Станој Манчев влезени во осмата деценија од животот велат дека ако порано во Кучичино имало 10.000 крави и овци, сега нема од каде купат млеко и сирење. Ако порано имало големи паралелки со ученици од прво до осмо одделение, годинава имаат само едно прваче.
На осумдесет годишниот Станој Манчев децата се иселиле во Куманово, Скопје и Италија, а со неговата домаќинка живеат сами. Се надева дека неговиот син ќе се врати од Италија.
Селото ги има сите услови за нормален живот, бидејќи има водовод, улици и е поврзано со патишта со останатите општини, како и со поголемите градови Штип и Кочани. Осумдесет и две годишниот Стојанов кој има седум хектари ниви и се уште половина од нив ги обработува вели дека оние коишто ги гласаат на секои избори треба малку повеќе да се загрижат за земјоделците и луѓето кои живеат во руралните средини.
Градоначалниците од Источно планскиот регион во текот на годината ќе прават нова Стратегија за развој, а меѓу врвните приоритети е да се запре иселување на младите преку низа на мерки и бенефиции.
За 20 години од 11 општини од Брегалничкиот регион си заминале 31.624 жители, или тоа е како да се иселиле сите жители од Општина Кочани. Младите од истокот бегаат бидејќи и посиромашно се живее, односно просечната нето плата изнесува 435 евра, додека во скопскиот регион, кој е најбогат просечната плата е 586 евра. Разликата во платите е над 150 евра.
Викторија Јованова