Израел ги презеде три Израелки кои во изминатите 15 месеци беа во заложништво на Хамас. Тоа се Дорон Штејнбрехер (31), Емили Дамари (28) и Роми Гонен (24). Тие се првите заложнички кои се враќаат во рамки на првата фаза од договорот за примирје меѓу Израел и Хамас која треба да трае 42 дена.
„Три повратнички моментно се придружувани од елитни единици на ИДФ и безбедносните сили Шин Бет на пат кон Израел, каде ќе бидат подложени на иницијална медицинска проценка“, се наведува во постот на израелските одбранбени сили на Икс.
Во првата фаза од договорот се предвидува враќање на 33 заложници од Газа и ослободување на стотина палестински затвореници од израелските затвори. Денеска е најавено ослободување на 90 Палестинци, чие примопредавање сè уште не е познато кога ќе се случи.