Турските власти уапсија тројца градоначалници од редовите на главната опозициска Републиканска народна партија (ЦХП), јавуваат локалните медиуми.
Приведени се градоначалниците на Анталија, Адана и Адијаман, како и заменик-градоначалникот на истанбулскиот округ Бујукчекмеџе, во рамки на поширока истрага што трае од октомври минатата година.
Според обвинителството, уапсените се осомничени за изнуда, заедно со уште осум други лица.
Меѓутоа, ЦХП ги отфрла обвинувањата, оценувајќи ги апсењата како дел од политички мотивирана кампања против партијата, која веќе подолго време е во судир со власта на претседателот Реџеп Таип Ердоган.
Ова е уште еден случај во низата апсења на опозициски функционери.
Во март годинава беше уапсен и градоначалникот на Истанбул, Екрем Имамоглу – еден од водечките противници на Ердоган – што предизвика масовни протести ширум Турција, најголеми во последната деценија.