Премиерот на Гренланд, Мут Б. Егед, изрази јасен ставот дека жителите на островот не сакаат да бидат дел од САД, иако ги разбира интересите на новоизбраниот американски претседател Доналд Трамп за најголемиот остров.
Трамп претходно изјави дека не ги исклучува економските притисоци или воената сила за да го присили островот да стане дел од САД, нагласувајќи дека тоа би било прашање за националната безбедност на земјата.
Егед, сепак, потенцира дека Гренланд сака да биде независен и дека жителите на островот се стремат да бидат Гренланѓани, а не Американци или Данци.
Гренланд, иако е автономен регион на Данска, има стратешка локација во Арктикот и значајни природни ресурси, како нафта, гас и минерали. Овој регион станува сè поважен поради климатските промени, кои доведуваат до топење на мразот и откривање нови економски можности, што го прави атрактивен за големите светски сили како САД, Русија и Кина, кои се борат за влијание во оваа чувствителна област.
Егед, кој се залага за независност на Гренланд, ја критикува Данска, тврдејќи дека често не се однесува соодветно со локалното население, Инуитите.
Тој истакнува дека Гренланд е дел од северноамериканскиот континент и дека неговите жители го сметаат островот како „свој дом“, кој не треба да биде дел од други нации.
Во контекст на стратешката позиција на Гренланд, Трамп негирал дека изразил намера за присвојување на островот, но неговите коментари ја разгореа дискусијата во Данска и Европа.
Иако на Гренланд живеат само 57.000 луѓе, островот е најголемиот во светот, со огромни ресурси и геополитичка важност која продолжува да го привлекува вниманието на глобалните сили.