Откако кулминираше проблемот со јавниот превоз во Скопје и многу автобуси на ЈСП останаа во гаражи, а граѓаните без надеж чекаа по постојките, и официјално беше обелоденето дека проблемот е во недостиг на дизел гориво во ЈСП.
И директорот на ЈСП во краток разговор за Телма со одговор „очигледно е“ на прашањето дали проблемот е во недостиг на гориво ја потврди причината.
На веб сајтот на јавни набавки стои дека пред една недела е поништена постапката за набавка на гориво еуродизел по инструкции на Бирото за јавни набавки.
„По инструкции од Бирото да се поништи постапката во управен надзор“ е причиназа прекинување на постапка предвидена и со законот за јавни набавки. На 13-ти ноември (денот на ослободување на Скопје) е донесена последната одлука со која на тој начин е прекината постапка за јавна набнавка и тоа за нафтата на ЈСП. На веб сајтот нема подетални објаснувања што е откриено и поради што е прекината постапката. Бирото за јавни набавки може да даде инструкции за прекин на тендерот после спроведување на управна контрола, стои во законот за јавни набавки.
Според законот, управна контрола врши Бирото пред испраќање на одлуката за избор или за поништување на постапката. Управната контрола се спроведува во седиштето на Бирото.
Бирото законски смее да изврши управна контрола на постапките за јавни набавки чија проценета вредност е над 500.000 евра во денарска противвредност кај набавката на стоки или услуги и над 2.000.000 евра во денарска противвредност кај набавката на работи.
Во законот е наведено и дека „Ако Бирото при вршење на управната контрола утврди една или повеќе неправилности кои имаат обележје на прекршок согласно овој закон или казниво дело, може да поднесе прекршочна пријава до надлежниот суд или да го извести надлежното јавно обвинителство на Република Македонија.“
За управната контрола за набавката на ЈСП нема информации од Бирото за јавни набавки дали доколку се откриени неправилности тие се пријавени на надлежните органи.
Законски управната контрола се врши во рок од 10 дена и во тој рок се прекинува постапката до завршување на контролата.
Во чле 177 од Законот за јавни набавки е наведено дека „Доколку Бирото најде неправилности кои влијаат врз исходот на постапката, ќе даде инструкции што треба да преземе договорниот орган за да ги отстрани неправилностите или да ја поништи постапката доколку во оваа фаза од постапката истото не е можно.“
Врз основа на таквите инструкции од Бирото за јавни набавки, огласот за нафта на ЈСП е поништен и потоа е распишан нов. Во меѓувреме ЈСП останува без доволно нафта и градскиот превоз колабираше во средата (20.11.2024) околу пладне кога десетици автобуси се повлекуваа од улиците.
Скопската градоначалничка Данела Арсовска ја обвини новата директорка на Бирото за јавни набавки и премиерот Мицкоски за проблемите со превозот во Скопје.
-Кадарот на шефот на ВМРО-ДПМНЕ во Бирото за јавни набавки, Маре Богева, креира криза во ЈСП за гориво, со тоа што за првпат од постоењето на претпријатието ја поништи редовната јавна набавка за гориво во ЈСП како смислено сценарио. Од моментот кога Мицкоски отпочна да преговара со компанија за набавка на 100 електрични автобуси, кое како и ветувањето за вкупно 250 нови автобуси од програмата за Скопје, отпочна и голготата на претпријатието. Во исто време почнаа и шпекулации за урнисување на ЈСП поради можно сценарио за негова приватизација, соопштија од град Скопје.
Спомнатите не одговорија на обвинувањата и зошто Бирото за јавни набавки издало инструкции да се поништи набавката на еуродизел за автобусите на ЈСП.
Директорката на Бирото за јавни набавки Маре Богева Мицовска е назначена на таа позиција во јули 2024-тата. Има докторско звање со научни трудови од областа на јавни набавки и ревизија. Била директорка на Бирото и во време на владата на ВМРО-ДПМНЕ и ДУИ во премиерскиот мандат на Никола Груевски. Ја извршувал директорската функција во период меѓу 2006-та и 2014-та година. Неколку јавни набавки од тој период (мерцедесот на МВР, возила во МВР, набавки за Скопје 2024-та) беа истражувани од страна на СЈО, а за некои како случајот „Тенк“ за блиндираниот мерцедес купен од МВР имаше обвинение и судски пресуди со затворски казни за Груевски и Гордана Јанкуловска.
Откако по една деценија Богева Мицовска се врати на чело на БЈН, Бирото со инструкции поништи 4 постапки од кои две се на јавни претпријатија во град Скопје, за набавка на гориво за да ги извршуваат обврските кон граѓаните. Една од нив е набавката на дизел на ЈСП.
Граѓаните се незадоволни и веќе се најавуваат протести за во петок пред град Скопје. Некои делови како Шутка немаат никаков јавен превоз по што на протест повика и градоначалникот Курто Дудуш.
Денешната катаклизма во јавниот превоз пак ги разбуди и советниците и политичките партии. Опозиционата СДСМ побара вонредна седница за да се решат проблемите со превозот. Претседателот на градскиот совет Трајко Славески закажа седница на Советот за четврток во 18 часот.
-Нефункционирањето на јавните претпријатија во надлежност на град Скопје, задолжени да обезбедуваат витални услуги за граѓаните, достигна кулминација. Совет на град Скопје утре, 21 ноември, ќе одржи итна вонредна седница со почеток во 18:00 часот. Советот, во рамките на своите надлежности, е подготвен низ конструктивна расправа да усвои заклучоци со кои ќе побара од надлежните, пред сѐ од градоначалникот Арсовска и директорите, итно да го нормализираат јавниот превоз на територијата на град Скопје и да го подигнат нивото на хигиена, сподели Славески преку социјалните мрежи.
ЈСП и директорот Кушевски предупредуваа на седници на Советот дека претпријатието е пред колапс, но нивните апели не беа послушани и сите предлози за набавка на нови автобуси беа отфрлени од страна на најголемата советничка група на ВМРО-ДПМНЕ. Тие пак го оправдуваа своето „не“ со тврдење дека нема финансиски план за набавката. Град Скопје потоа не доби ниту еден проект на владиниот конкурс за помош на локалните самоуправи иако имаше повеќе предлози на конкурсот.
Данела Арсовска на изборите пред три години беше поддржана од ВМРО-ДПМНЕ, но по една година, таа коалиција се растури. ВМРО-ДПМНЕ обвинува за неспособност на Арсовска додека таа тврди дека е цел на притисоци.
Миомир Серафиновиќ
Тотален хаос во Скопје: Попладнево сите автобуски линиии престанаа да сообраќаат