Вардар вечерва од 20:45 часот му гостува на Порто во рамки на 4.коло во Европската лига на ЕХФ. „Црвено-црните“ на овој натпревар ќе бидат предводени од клупата од Стојанче Стоилов, кој привремено ќе го преземе кормилото по отказот за тренерот Владо Недановски.
Најтрофејниот македонски клуб минатата недела загуби на домашен терен од Порто со 22-26 и значително си ги намали шансите за освојување на 2.место во групата Ф што води во следната фаза од натпреварувањето. На скопскиот состав вечерва ќе му треба поубедлива победа од четири голови разлика за да се врати во игра за 2.место, но ќе му треба и добар резултат на гостувањето кај Валур.
Слабите резултати во Европската лига значеа и промена на клупата на „црвено-црните“, па раководството реши да се раздели со Владо Недановски. Неговиот помошник Стојанче Стоилов привремено ќе го води тимот барем додека не биде назначен нов тренер. Претседателот Михајло Михајловски најави дека клубот е во преговори со тројца тренери и до среда ќе се знае кој ќе го предводи тимот во продолжение од сезоната.
Лидерот во групата Мелсунген, кој има максимални три победи од три натревари вечерва гостува кај Валур, кој е последен во групата со 1 бод освоен против Порто на домашен терен.
Фото: Игор Паневски