Работнички го доживеа и вториот убедлив пораз во рамки на АБА2-лигата откако вечерва загуби на гостувањето кај Војводина со 93-62 во рамки на 2.коло.
Македонскиот тим беше во негатива во текот на целиот натпревар, но во првото полувреме успеваше да одржи каква-таква резултатска неизвесност. По двете четвртини резултатот беше 47-38. „Центарци“ беа со скратена ротација, бидејќи на гостувањето во Нови Сад заминаа со десет играчи, па заморот си го направи своето во вториот дел.
Војводина само ја зголемуваше предноста, која во последниот период достигна и највисоки +35. Работнички до крајот само успеа минимално да намали за конечни 93-62.
Виктор Ефремовски со 17 и Стојан Ѓуроски со 15 најмногу се истакнаа во таборот на Работнички, додека кај Војводина најдобар беше Џордан Дингл со 15 поени.
За потсетување, Работнички во првото коло од групата Б на домашен паркет загуби од Сутјеска со 58-71, а во следното трето коло на 23.октомври ќе ја пречека екипата на Босна.
Од останатите македонски тимови во АБА2, МЗТ во четврток гостува кај Цедевита Јуниор во рамки на групата А, додека Пелистер својот дуел од 2.коло од групата Ц против Подгорица го игра дури на 15.октомври на гостински паркет.