Поради санкциите воведени како резултат на инвазијата на Украина, Русија сега е во опасност да влезе во „длабока рецесија“, вели шефицата на ММФ Кристалина Георгиева.
Девалвацијата на рубљата, веќе значително ја намали куповната моќ на руското население, додава таа. Меѓународните девизни резерви на руската централна банка се главно блокирани како резултат на санкциите, што и отежнува на Русија да го стабилизира курсот на рубљата.
„Русија има пари да го сервисира својот долг, но не може да пристапи до нив“, вели Георгиева. Покрај тоа, сервисирањето на државниот долг во странски валути, како што се американски долари или евра, станува сè покомплицирано.
Георгиева минатата недела изјави дека ММФ ќе ја намали претходната прогноза за глобален економски раст од 4,4 отсто во 2022 година како резултат на војната, но рече дека целокупната насока останува позитивна.