Вакцината од АстраЗенека ќе ја сочинува првата количина која земјава ќе ја добие преку Ковакс системот, која е планирано да пристигне во март годинава. Министерството за здравство вчера информира дека Ковакс системот преку допис ги соопштил деталите за првата испорака и типот на вакцината која ќе пристигне во нашата земја.
Системот, како што потенцираат од Министерството за здравство е целосно подготвен да ги прими количините на вакцините преку Ковакс механизмот, но истовремено обезбедува вакцини од други производители и преку други механизми, кои Република Северна Македонија треба да ги добие. За таа цел во Собранието беа изгласани измените и дополнувањата на Законот за лекови и медицински средства кои се однесуваат на регистрација на вакцините против Ковид-19 во земјата, се наведува во соопштението.
Премиерот Заев изјави дека во текот на февруари во земјава треба да пристигнат вакцини од повеќе производители достапни за граѓаните, а првите ќе бидат вакцината на „Фајзер“ и вакцината на „Синофарм“.
Земјава, потенцираат од Министерството за здравство, има развиена безбедна и сигурна логистичка поддршка за прием, складирање и дистрибуција на вакцините до вакциналните пунктови каде што ќе се спроведува вакцинацијата. За вакцините за кои што е потребно одржување на стандарден ладен ланец од 2°С до 8°С се користи постојниот логистички систем. За вакцините кои имаат посебен температурен режим на прием, складирање и транспорт на температура пониска од -70°С или -20°С се надогради постојната мрежа со обезбедување соодветни ладилници.
Според дописот за земјава се предвидени помеѓу 103.200 и 175.200 дози од оваа вакцина, од кои околу 35 отсто треба да пристигнат во првиот, а останатите во вториот квартал од годината.
Од Фајзер вакцините, како што навеле од Ковакс, во првиот бран на достава се вклучени 18 учесници, а не се вклучени земјите кои започнале сопствени програми за вакцинација против Ковид-19 и оти другите ќе бидат вклучени во идните фази на дистрибуција.