Македонија

Проширувањето на ЕУ се враќа на дневен ред на амбасадорите оваа недела

Последен обид на германското претседателство ќе има во среда да се усвојат заклучоците за проширувањето на ЕУ, вклучително и за Северна Македонија.

Како што пренесува МИА, во среда ќе се одржи нов амбасадорски состанок на кој на дневен ред се ставени заклучоците за проширувањето, кои беа отстранети минатата недела поради блокадата на Бугарија за преговорите со Северна Македонија.

Дискусијата за проширувањето беше целосно симната од дневен ред поради несогласувањата помеѓу земјите членки на ЕУ, посебно поради ставот на Софија дека не може да се одржи првата меѓувладина конференција за пристапни преговори со Северна Македонија без решавање на билатералните спорови.

Оваа недела германското претседателство ги враќа заклучоците за проширувањето на дневен ред. Тука спаѓаат и другите земји од западниот Балкан заедно со Северна Македонија.

Нејасно е во овој момент каков компромис ќе предложи германското претседателство. Извесно е дека претседателството подготвува нови заклучоци, но овие сѐ уште не се објавени, и МИА не е запознаена со нивната содржина за сега.

Главната информација што циркулира веќе две седмици во дипломатските кругови во Брисел е дека се бара компромис околу формулација поврзана за „погрешна интерпретација на историјата“.

Додека претседателството на ЕУ смета дека оваа реченица треба да биде сместена во уводот за сите земји од регионот, Софија, според дипломатски извори, сака таа да биде вметната специфично за Северна Македонија, повикувајќи се на дамнешни заклучоци, од 2018 година кога се усвоија договорите за добрососедство со Грција и Бугарија.

Останува сега да се види каков компромис предлага германското претседателство.

Последните нацрт заклучоци исто така гласат дека првата меѓувладина конференција треба да се одржи „што е можно поскоро“ со Северна Македонија и со Албанија, но за Албанија со дополнителни услови.

Одредени земји членки на ЕУ инсистираат да се одвојат Скопје и Тирана, доколку не може да се надмине бугарската блокада, и да се даде барем формално зелено светло за Албанија.

© 2020 Телевизија Телма. Сите права се задржани. Овој текст не смее да се печати или емитува, во целина или во делови, без договор со Телевизија Телма.

Поврзани содржини

Секое новороденче во наредните 25 години ќе должи по 6.000 евра по раѓањето – Филипче за договорот со Велика Британија

Дејан Дејан

Примените и потрошените лекови за ретки болести не биле евидентирани во сметководствената евиденција – ревизорски извештај за Хематологија

Дејан Дејан

Денеска во Лондон ќе биде потпишан договорот за стратешко партнерство меѓу владите на Македонија и на Велика Британија

Дејан Дејан

Користиме колачиња на нашата веб-страна за да ви го дадеме најрелевантното искуство со запомнување на вашите преференции и повторни посети. Со кликнување на „Прифати“, вие се согласувате да се користат колачиња. Прифати Прочитај повеќе