Со шишиња жителите на тетовската населба Блок 70 полнат вода од надворешна чешма, бидејќи во нивните домови неколку дена има прекин во водоснабдувањето поради два поголеми дефекти во главната водоводна мрежа. Дополнително се жалат дека мора да купуваат вода за пиење, а отежнато им е и одржувањето на основните хигиенски потреби. Со истиот проблем и денес се соочуваат неколку населби во градот.
Старата дотраена водоводна мрежа е причината за честите дефекти и прекините во водоснабдувањето во Тетово. Градот долги години се соочува со вакви проблеми, а градскиот водовод е стар 90 години.
Повеќе од половина од жителите на Тетово од среда немаа вода, додека денес проценките се дека во 85 проценти од градот водоснабдувањето е нормализирано. Прекинот настана поради два поголеми дефекти во главната водоводна мрежа. Пред два дена се појави дефект на улицата Цветан Димов, на чие целосно санирање се работеше речиси два дена, за паралелно да се појави и дефект во паркот покрај Шарена џамија.
Данијела Билбилоска