Во вечерашната емисија Вин-Вин дебатираат Александар Новакоски, експерт за изборно законодавство и Снежана Калеска-Ванчева, поранешна пратеничка во Собранието.
Измени на изборното законодавство се на листата на обврските до јуни од реформаската агенда. Имплементацијата на препораките на мисијата на ОДИХР се адресирани, а последната одлука на Уставниот суд за независни листи создава правна празнина која ургентно законодавецот мора да ја регулира. Што е нужниот пакет измени и каков е тој голем консензус што треба да се обезбеди?
Калеска-Ванчева смета дека нема логика и потреба во чекањето и непревземањето на измените на Изборниот законик, како една од препораките на ОДИХР, бидејќи тоа само штетно се одразува. Додека за изработка и донесување на нов Изборен законик таа додаде дека е потребно многу време и тоа изискува вистински политички консензус.
„Ниту има логика ниту има потреба напротив чекањето и непревземањето кон носење на овие измени, само штетно ќе се одразува, бидејќи нов изборен законик да не се повторуваме е сосема нешто друго и тој бара многу време и е вистински политички консензус и тоа во моментот не можеме да си го дозволиме. Тоа бара јавни, експертски и стручни дебати не можеме ние повторно да влетуваме во таква приказна, а дека ни е потребен потребен ни е. Да не заборавиме дека имаме конкретни препораки од ОДИХР, нашата јавност препознава дека има потреба од тие препораки да бидат имплементирани“ изјави Снежана Калеска-Ванчева, поранешна пратеничка во Собранието.
Според Новакоски потребна е волја од министерството за правда, бидејќи текстот веќе и претходно беше изработен од работните групи, а единствено нешто што недостасува е политичка волја.
„Во еден временски период кога ќе има волја, готов е текст. Тој беше припремен од работната група, а министерството за правда и тогашниот министер за правда Кренар Лога го имаа текстот. Тоа не помина, бидејќи немаше политичка волја“ изјави Александар Новакоски, експерт за изборно законодавство.