Осомничениот обвинет за убиство по нападот со нож во кој загинаа три млади девојчиња во северозападна Англија на почетокот на неделата, денеска кратко се појави во Судот на Ливерпул.
Од 17-годишниот осомничен не беше побарано да се изјасни и му беше одреден притвор до неговото следно рочиште, закажано за подоцна во текот на денот.
Осомничениот не е именуван бидејќи е помлад од 18 години, но полицијата вели дека е роден во Велика Британија.
Тој не е обвинет за терористички дела, но се соочува со три обвиненија за убиство поради смртта на Алис Дасилва Агиар (9), Елси Дот Стенкомб (7) и Бебе Кинг (6) во приморскиот град Саутпорт.
Тој, исто така, е обвинет за 10 точки од обвинението за обид за убиство над осум деца и двајца возрасни кои биле повредени.
Неколку од жртвите и понатаму се во критична состојба.
Нападот врз децата во клубот за танц ја шокираше земјата каде злосторствата извршени со нож се долгогодишен и вознемирувачки проблем.
Смртта беше искористена и од екстремно десничарски активисти за да го разгорат гневот на имигрантите и муслиманите – иако осомничениот не е имигрант, а неговата религија не е откриена.
Премиерот Кир Стармер ги повика шефовите на британската полиција на кризен состанок поради насилните немири кои следеа по нападот.
Демонстрантите од крајната десница – делумно поттикнати од дезинформациите на интернет – одржаа неколку насилни протести, наводно како одговор на нападот, и иницираа судири со полицијата пред џамијата во Саутпорт.