За првпат во историјата на независна Македонија една државна институција како што е Комисијата за спречување и заштита од дискриминација бара судска заштита против државна институција, во овој случај против МОН, како орган на Владата. Тужбата ќе биде во најскоро време доставена до судот, вели Бендевска.
„Нашиот закон е LEX GENERALIS кој вели заштита од дискриминација на највисоко ниво дава судот. Судот е оној кој дели правда и навистина ајде да го тестираме судот. Ние како експертско тело најдовме дека се работи за најтешка форма на дискриминација која опфаќа многу голем дел ученици од основно образование“, изјава Весна Бендевска, од Комисија за спречување и заштита од дискриминација.
Комисијата за спречување и заштита од дискриминација ќе започне со стратешко застапување на интересите на основците против МОН, доколку имаме предвид дека веќе четврта учебна година одреден број на ученици се без основното средство за стекнување на знаење.
Во своето образложение, МОН потенцира дека процесот на изработка на учебници е комплексен проблем и зависи од многу фактори. Со овој став согласна е и претседателката на Националната комисија за учебници Лазаревска – Станчевска. Таа најви дека се очекува веќе следната недела да започне дистрибуција на учебниците за трето одделение.
„Со воведувањето на овој нов концепт во основното образование започнати се коренити реформи и за да се спроведе успешно и во целост потребно е време и ресурси, а впрочем за оние програми за кои сè уште не се изготвени учебниците постојат наставни материјали кои им се дадени на наставниците да работат“, изјава проф. д-р Јованка Лазаревска – Станчевска, претседателка на Национална комисија за учебници.
Што се однесува до официјалниот став на МОН дека процесот на изработка на учебници е комплексен проблем, Бендевска вели дека не е издржан аргумент затоа што нивна должност е да обезбедат услови за квалитетно образование и како сето тоа да го реализираат навремено.
Нина Стефанова