Триест и пет годишниот Ранко Србакоски од Вевчани викендов ја згрози македонската јавност, со расистички и ксенофобични напади кон штипјанецот Зоран Мијалков, познат граѓански активист и самохран татко на две деца со аутизам. Пораките се објавени на социјалната мрежа фејсбук , а во нив Србакоски пишува дека децата со аутизам треба да се извор на човечки органи и се терет на државата. Мијалков вели дека не му е првпат да се соочи со лице кое нема емпатија кон децата со посебни потреби, случајот денеска ќе го пријави во полиција, а вчера реагираше и првата детска амбасада „Меѓаши“.
Србаковски се соочува со казна затвор од една до пет години. МВР денеска потврдија дека пријавата од „Меѓаши“ е пристигната и кусо одговорија дека веќе работат на случајот. Од Меѓаши се упати и апел родителите да ги пријавуваат ваквите случаи.
Мијалков кој сам се грижи за своите деца вчера доби силна поддршка од граѓаните и граѓанските активисти. Голем број на случаи во кои се линчуваат родителите и децата со посебни потреби завршуваат без да се пријават, а сторителите остануваат неказнети и продолжуваат со ширење на говор на омраза.
Викторија Јованова
