И додека опозицискиот претседателски кандидат Кемал Киличдароглу сѐ уште не излегол со официјален став во врска со денешните избори, на кои беше поразен од актуалниот претседател со 52 наспроти 48 проценти од гласовите, Ердоган триумфално од отворен автобус им се обрати на своите приврзаници во Истанбул.
Единствениот победник е Турција, им порача тој, но и не пропушти прилика со зборовите „Збогум Кемал“ да испрати и порака до опонентот кој по 10 години редовни изборни порази, успеа на последните претседателски избори да се покаже како достоен предизвикувач.
Ердоган во својот краток победнички говор имаше време да се наврати и на една од своите омилени теми во предизборната кампања, обвинувајќи го опозицискиот лидер дека ги прифатил про-ЛГБТ политиките. Ова е секако беше наменето за неговата религиозна и конзервативна гласачка база.
Но, иако Ердоган инсистира дека оваа изборна победа е победа на 85-те милиони Турци, сепак овие избори покажаа дека земјата е длабоко идеолошки поделена.
