Најмалку седум лица загинаа, а 69 се повредени при уривање на два железнички моста во западни региони на Русија кои се граничат со Украина. Според руски официјални претставници, инцидентите ги предизвикале експлозии, без да наведат детали. Велат само дека се поврзани, а рускиот истражен комитет соопшти дека ќе ги истражи инцидентите како потенцијални акти на тероризам за кои се сомневаат дека стои Украина. Цела ноќ и претпладне се работи на пружање на сета помош на повредените и повторно оспособување на оштетената пруга за сообраќај.
„На повредените им се пружа сета неопходна помош, а се работи и на санирање на оштетените пруги. Два воза за поправка и две инженерски возила се распоредени за демонтажа на фрагментите од мостот и расчистување на шините од излетаната локомотива и вагоните“, изјави Пјотр Фирсенков, в.д. заменик-шеф на руското Министерство за вонредни ситуации во Брјанск
Првиот инцидент се случил ноќеска, околу еден час пред полноќ, на мост над железничка пруга во областа Бријанск во која е прогласена тридневна жалост. Во моментот на уривање, под него минувал воз со 388 патници, наведоа руските истражни органи. Четири часа подоцна се урна и железнички мост над автопат во областа Курск, што резултира со излетување на товарен воз од шините. Двата воза се сопственост на руските државни железници.
Руските региони кои граничат со Украина се честа мета на украински напади од почетокот на руската инвазија во февруари во 2022 година. Двете страни меѓусебно се обвинуваат за гаѓање на цивилни цели, но и двете ги негираат таквите наводи.
Украинското воено разузнавање денеска соопшти дека руски воен товарен воз, кој превезувал храна и гориво, бил разнесен на пат кон Крим, без да навлегува кој ги извршил нападите, ниту пак во него се споменува уривање на мост. Засега нема коментар од официјален Киев за железничките инциденти во Бријанск и Курск. Двата инцидента се случија на ден од најавената втора рунда на мировни преговори меѓу Москва и Киев во Истанбул, со посредство на САД.
Сашко Димовски