Жителите на Скопје од населба Железара веќе 40 часа се без вода. Она што беше најавено како зафат од најмалку 15 часа, се претвори во борба за основна потреба – капка вода. На една од највисоките точки во Железара е поставена единствена цистерна од која граѓаните се обидуваат да наполнат шишиња и кофи. Тие велат недоволно е, и предоцна дојде.
Од ЈП „Водовод“ тврдат дека работата е успешно завршена. Се спровел редок зафат кој, како што велат, се прави еднаш на 60 години. Проблемите, според нив, настанале при полнење на мрежата и преголема потрошувачка која го нарушува стабилниот притисок.
„Монтажата на игличест регулационен вентил и поврзувањето на два магистрални цевководи е технички завршена. Мораме постапно да пуштаме вода за да избегнеме дефекти. Утрово се стабилизираше притисокот во Железара, но поради преголема потрошувачка од Чаир, мрежата пак падна. Апелираме за трпение и рационално користење“, информираат од „Водовод“.
Од терен, пак, на булевар „Словенечка“, преку вклучување во живо на социјалните мрежи, се огласи и градоначалничката Данела Арсовска. Таа директно обвини дека граѓани диво се поврзуваат на атмосферската канализација, што, според неа, доведува до дефекти и проблеми од ваков обем.
Проблемот со долгите прекини на вода не е нов за Скопје. Слична ситуација неодамна се случи и во Карпош.
Тамара Марковска