Никој не призна вина од обвинетите во случајот „Адитив“ на денешното рочиште во судницата во Идризово. Обвинети се 32 физички и 5 правни лица. На поранешниот директор на ЕСМ, Васко Ковачевски кој е во бегство ќе му се суди во отсуство. Обвинети за неколку кривични дела се и неговиот наследник Васко Стефанов, како и екс директорите на РЕК Битола, Пеце Матевски и на ТЕЦ Неготино, Небојша Стојановиќ и поранешните комерцијални директори на ЕСМ, Адријан Муча и Данчо Стојановски.
Ја злоупотребиле набавката на адитив за потребите на РЕК Битола и РЕК Осломеј. На фирмата „Браинкоде“ која го добила тендерот ѝ овозможиле да се стекне со имотна корист од 6,4 милиони евра. Дел од обвинетите примале пари, ги пуштале во оптек, извршувале пренос на средствата и подигнувале готовина во износ од 6,7 милиони евра.
Меѓу обвинетите е и велешанката Маја Јорданова, сопственичка на фирмата „Браинкоде“. Екс директорот Стојановски ѝ е роднина. Адитивот бил со цена неколку пати повисока од пазарната, а на вработените им предизвикал и здрваствени проблеми. Обвинителката Трајкова вели дека обвинителството има многу докази и очекува пресуда со која ќе се изврши и конфискација на имот. А на обвинителна клупа освен семејството на Стојановиќ, односно неговата сопруга, брат и татко е уште едно семејство Алексовски за изгрување на тендерот и за перење пари.
Во однос на претседателката на ДКСК, Татјана Димитровска која е осомничена дека му оддавала службени тајни на Стојановиќ, обвинителката информираше дека истрагата е во тек и дека податоците од нејзиниот телефон кои се во голем број се екстрахирани и се анализираат.
ЕСМ на судењето побара оштета во вредноста на тендерот. Судењето продолжува на 26 јуни со воведни зборови на одбраната. За еден од обвинетите постапката ќе се одвива одделно бидејќи е на домашно лекување.
Марија Митевска