Општина Чаир е под опсада, реагираше со војничка терминологија синоќа општината, откако скопската градоначалничка Данела Арсовска го обвини градоначалникот Висар Ганиу дека употребувал фалсификувани документи при легализација на стан во зграда дивоградба.
„Општина Чаир изразува разочарување поради фактот што г-ѓа Арсовска, во последните месеци од нејзиниот мандат на чело на Градот Скопје, наместо да се фокусира во презентација на сработеното во изминатите четири години, дозволи да биде инструментализирана и да се претвори во извршител на сомнителни политички агенди, кои не случајно го одбраа токму Чаир и неговите жители да ги бијат нивните последни политички битки“, соопштија од општината.
Во реакцијата нема детали ниту објаснувања за наводите за фалсификат ниту за обвинувањата на Арсовска дека чаирскиот градоначалник и се заканувал на нее и нејзиното семејство. Општината раководена од Ганиу смета дека станува збор за туѓа политичка агенда која ја спроведува Арсовска и произведува кризи таму каде што нема.
„Сликите кои што ги приреди г-ѓа Арсовска како забава за масите, во меморијата на Чаир ги вратија настаните од крајот на 80-тите години, кога на Албанците им се рушеа куќите во Дижонска, додека политичарите Албанци се криеја некаде низ „сараите„ на политиката. Прочитани сте. За оваа опсада на Чаир, нарачателите ќе добијат соодветен одговор многу брзо“, порачуваат од општината.
