Во Прилеп во тек се проверки и претреси во прилепската болница и на повеќе локации во рамки на истражна постапка на финансиската полиција.
Според првичните информации станува збор за проверки на јавни набавки и тендери во болницата во период од 2020-та до 2024-та. Претресите се вршат со цел да се пронајдат докази во истрагата и документи поврзани со сомнежите за злоупотреби при јавни набавки.
Основното јавно обвинителство Прилеп постапува во предистражна постапка поради сомненија за кривично дело Злоупотреба на службена положба и овластување, а поврзано со финансиското работење на болницата.
-Обезбедени се наредби за претрес на осум локации, а дејствијата ги презема Управата за финансиска полиција. По претресите, предистражната постапка ќе продолжи со други дејствија за обезбедување докази, соопштија од Обвинителството.