Пред главниот влез долга редица за бесплатни билети за денешниот театарски маратон, со кој што МНТ прославува осум децении постоење. А, внатре, на малата сцена, изведба на детската претстава „Распеана турлитава“. Работена е по текст и во режија на Снежата Конеска – Руси, највозрасната активна актерка од овој театар, со кариера долга 50 години.
„Целта е многу јасна. Ова е пред сѐ претстава за најмладата популација. Најстарата актерка за најмладата популација сѐ уште се грижи“, рече Снежана Конеска – Руси.
До крајот на денот, во МНТ ќе бидат изведени уште три претстави – „ Бели ноќи“, „Мој термин“ и „Торонто експрес“. Тие се од различни жанрови и за сите вкусови на публиката. Ова е само дел од богатиот репертоар на МНТ, кој што за осум децении реализирал над 400 премиери. А, дел од нив се обнови. Така, МНТ се стреми да направи спој меѓу минатото, сегашноста и иднината, раскажувајќи приказни поголеми од времето.
„Учиме од историјата, ја живееме сегашноста, но се стремиме кон иднината, кон визијата, кон она што следи“, кажа Ивана Јарчевска од МНТ.
МНТ е формиран со одлука на Президиумот на АСНОМ на 31 јануари 1945 година. На 3 април истата година е изведена премиерата на првата претстава „Платон Кречет“, во режија на Димитар Ќостаров. Првата реплика од претставата ја изговорила Вера Вучковаќ – Жежељ, а таа е наслов на спектаклот за прославата на јубилејот.
Поради трагичниот настан во кочанската дискотека „Пулс“, планираниот спектакал за одбележување на јубилејот, 80 години МНТ, насловен „Сонцето, колку е блиску сонцето, Made in MNТ“ е одложен. Но, тој ќе биде изведен наесен, а ќе го режира Дејан Пројковски, велат од МНТ.
Сотир Трајков