Вработените во НУ Охридско лето не ги добиле платите и здравственото осигурување за август, а под знак прашање е и исплатата на септемвриските плати. Иако директорот на установата уредно и навреме доставил барање за исплата на платите за август, со сите додатоци за прекувремена работа , додека траеше фестивалот, вработените се оставени на чекање, алармираа од Синдикатот за култура. Од таму велат дека од Министерството за култура и туризам, во барањето за исплата на августовските плати до Министерството за финансии, укажале дека тоа барање има неправилности. Од СКРМ објаснуваат дека согласно Законот за извршување буџети , директорот на установата е одговрен за изготвување на документацијата за исплата на плати.
- Во тој случај, Министерството за култура е потребно да поведе постапка против директорот на Охридско лето , доколку смета дека платата е направена со неправилности, а не да ја враќа и да ги принудува во институцијата да ја преправаат, односно да ги извадат додатоците на плата што следуваат, согласно законот. Инаку, во Охридско лето е дојдена и Трудова инспекција , значи на барање на вработените, и не се констатирани никакви неправилности, вели Вера Атанасовска- претседател на СКРМ.
Ист проблем во „Охридско лето“ имале и со јулските плати, што требале да се исплатат со додатоци , поради прекувремените часови работа за време на фестивалот. И тогаш од ресорот Култура и туризам имале забелешки, но попуштиле, вели Атанасовска. А, од „Охридско лето“ , велат дека тешко живеат без плата и бараат августовската да им се исплати веднаш, со додатоците.
- Ние очекуваме уште денеска истата, со сите одработени часови, прекувремени, ноќни, работа во недела , да ни биде исплатена, затоа што тоа е законски. Знаете дека Охридско лето , како наша најголема сценско – музичка манифестација , реализира настани во периодот од 12 јули до 20 август. Тоа се над 1000 уметници, околу 50 настани, тоа е многу работа , многу откажувања , многу посветеност на сите вработени, вели Сузана Вренцоска- лице за односи со јавност во „ Охридско лето“.
А, од ресорот Култура и туризам велат дека во буџет за 2024 година, наменет за плати, не се обезбедени дополнителни средства за додатоците, што ги бараат вработените во „Охридско лето“ и се повикуваат на користење слободни денови, согласно Законот за буџети . За пресметката на платите за јуни, јули и август, од ресорот ги известиле Министерството за финансии, Инспекторатот за труд и Државната комисија за одлучување во втор степен, во областа на инспекцискиот надзор и прекршочната постапка. Од нив сѐ уште не добиле одговор дали пресметките биле или не неправилни и сугерираат вработените да тужат на граѓански суд, ако не сакаат да ги чекаат одлуките на државните органи.
Сотир Трајков
