Македонскиот одбојкарски првак Струмица загуби од Олимпијакос со 3-0 и на реванш натпреварот од првото квалификациско коло за пласман во ЦЕВ Лигата на шампиони. Нашиот сега ќе продолжи да игра во Европа и ќе се натпреварува во ЦЕВ Купот.
За разлика од првиот натпревар во Струмица минатата недела, денеска македонскиот шампион даде далеку посилен отпор против фаворитот иако повторно загуби во три сета. Денеска нашите одбојкари освоија далеку повеќе поени и беа близу да освојат и сет. На крајот Олимпијакос заслужено се радуваше на триумф од 25-19, 25-17 и 25-21.
Грчкиот тим во Лигата на шампиони во рамки на 2.коло ќе се соочи со подобриот од пресметката помеѓу Гуагас и Бенфика, а на првиот натпревар шпанскиот состав славеше со 3-1.
Што се однесува до Струмица ова не е крај на европскиот пат, бидејќи нашиот тим ќе продолжи да игра во ЦЕВ Купот, каде ќе се соочи со поразениот од дуелот помеѓу Капошвар и Инсбрук од Лигата на шампиони.
Фото: ЦЕВ