За опозицијата, ребалансот на новата влада е опасен за иднината на државата, за власта со прекројувањето на државната каса се крателе несуштинските трошоци од нивните претходници. Почна расправата за ребалансот во Собранието. Пратеникот од СДСМ, Битиќи рече дека е загрижен за тоа како новата Влада го скрои буџетот за годинава. Вели, со него се прави директен удар и врз домашната економија и врз јавниот долг.
Министерката за финансии Кочоска, пак, која речиси еден час го презентираше ребалансот пред пратениците тврди дека со оглед на тоа што го затекнале, успеале да најдат пари за да се покријат сите законски обврски за кои не биле предвидени средства.
Преголемо е трошењето, од фискалниот совет се загрижени за висината на расходите. Велат мора да се намалат за да не се доведеме во лоша ситуација.
Со реакција излезе и првиот човек на Јавното обвинителство Коцевски, но и од судско буџетскиот совет. Велат со тоа што им се скратени пари во прашање е доведено функционирањето на судовите и обвинителствата.
Инаку, со ребалансот владата планира да потроши речиси 5,9 милијарди евра, а да собере 5,2 милијарди евра.
Буџетскиот дефицит се зголемува, но и јавниот долг ќе порасне на загрижувачки 68, 2 отсто од БДП. Инфлацијата се очекува да биде 3, 5 проценти, а растот скромни 2,1 отсто. Кај некои министерства и институции се крати, а некој добиваат повеќе пари.
Ребалансот на буџетот треба да биде изгласан во собранието најдоцна до првата недела од август.
Ирена Чачкова