Неточни и неосновани и со впечатлива политичка позадина, вака директорот на Јавното претпријатие за државни патишта, Ејуп Рустеми ги отфрли тврдењата на новиот министер за транспорт и врски Александар Николоски по наодите на Државниот завод за ревизија. Николоски вчера побара обвинителството да ја истражи работата на претпријатието бидејќи не само што доцни изградбата на автопатот Кичево Охрид, туку и нема одговори зошто сумата скокнала за 170 милиони евра, како и за автопатот кон Блаце кој не е започнат и за кој се планира километар да чини 20 милиони евра.
Во соопштение до јавноста Рустеми образложува дека вредноста на автопатот Кичево Охрид е зголемена преку носење на закон, а за автопатот до границата со Косово вредноста била зголемена од страна на независна консултантска куќа избрана од меѓународните кредитори.
„Јас, како директор, и ЈПДП, стоиме на располагање на сите надлежни институции за секаков вид на проверки и ревизии на нашето работење, за уште еднаш да се потврди законското работење преку реализација на Годишните програми за работа во изминатиот период за што сведочат и резултатите на претпријатието“, наведува Рустеми.
Николоски рече и дека иако претходните власти се фалеле дека патот Градско-Дреново е завршен во реалноста не е така. Рустеми се правда дека за изградба на патот за кој се обезбедени пари од ИПА фондовите, Министерство за финансии е “Договорен орган”, додека Министерството за транспорт и врски е “корисник“, а јавното претпријатие е крајниот корисник, кое како што наведува ги има извршено навремено сите обврски.
„Јавноста е запознаена дека во изминатиот период ЈПДП има реализирани рекордно ниво на капитални инвестиции во патната инфраструктура, сѐ со цел за подобрување на патната мрежа, на автопатското поврзување, на одржување и унапредување за безбедно одвивање на сообраќајот низ целата држава“, додава Рустеми.
Рустеми во соопштението се фали и дека минатата година започнал со реализација и најголемиот инфраструктурен проект во историјата Коридор 8 и Коридор 10д. Николоски пак најави дека по смена на директорот на државни патишта договорот со Бехтел и Енка за изградба на коридорите ќе биде декласифициран.
За постигнување на договорот беше донесен специјален Закон, а ревизијата не можеше да ја потврди проценетата вредност од 1,3 милијарди евра и беше нотирано отстапување од планираната динамика за градба.
Марија Митевска