Бугарија ги отфрла идеите за менување на Преговарачката рамка. Бугарското Министерство за надворешни работи потсетува дека 27 земји членки на ЕУ консензуално и самата Северна Македонија во 2022-та ги опишаа чекорите за вистински напредок во евроинтегративниот процес. „Покренувањето идеи за повторно преговарање на веќе преземените меѓународни обврски само ќе доведе до дополнително оддалечување на почетокот на преговорите за членство во ЕУ. Потсетуваме дека како резултат на непотребните провокации и конфронтации со соседните земји, Северна Македонија веќе изгуби премногу време во процесот на отварање на пристапните преговори“, се наведува во соопштението од бугарското министерство. Принципот на едногласност во процесот на проширување е вграден во Договорот. За Софија, „неприфатлива е искажаната намера на новата Влада да го отфрли легитимното барање на дел од сопствените граѓани за вметнување во Уставот“.
Ова соопштение од официјална Софија претставува реакција на изјавата на премиерот Христијан Мицкоски дека „доколку има политичка волја, можно е решение со Бугарија и промена на преговарачката рамка со ЕУ“.