Не можам да кажам дека се сеќавам на владите на Глигорие Гоговски и на Драгољуб Ставрев, но од она што се сеќавам, од владите на Никола Кљусев, па наваму, не се сеќавам дека една влада имала 100 дена. Тоа е само еден принцип кој што сакаме да кажеме дека постои, меѓутоа немало влада која што навистина имала 100 дена, без критики од јавноста, рече амбасадорот Ивица Боцевски во вечерашната „Топ тема“ на ТВ Телма.
„Мислам дека во историјата на демократска Македонија, критиките биле тука. Впрочем тоа е улогата и на јавноста и на опозицијата. На конститутивната седница на ова собрание, не џабе беа критикувани пратениците на СДСМ и на ДУИ, Едните избегаа, другите не се јавија за збор. Најчесто, конститутивните седници на македонското Собрание секогаш беа користени од опозицијата за таа да ја зацрта онаа траекторија на својата критика кон власта. Критиката почнувала од конститутивна седница на Собрание. Да не говориме за критиките додека трае изборот на влада. Така што тие 100 дена, во суштина, како принцип никогаш не важеле“, вели Боцевски.
Тој даде и свое гледање на тие 100 дена.
„На времето кога немало интернет, телефон, требало веста дека е избрана влада од главниот град до најоддалечената точка да стигне со коњ. И тој да се врати назад. Сто дена биле потребни и повеќе. И премиерот со право не остава 100 дена простор за критика“, истакна Боцевски и повтори дека „тие 100 дена се само флоскула кои што никогаш во демократската историја на Македонија не биле почитувана“.