Денеска се конституира 11-от парламент во независна Македонија. Седницата е ограничена на најмногу три дена, согласно новиот деловник.
Ќе се верификуваат мандатите на пратениците, треба да се избере и претседател на собранието. Во пратеничките клупи треба да седнат и шестмина претставници на техничката извршна власт.
Сите министри на СДСМ кои се избрани за пратеници ќе ги напуштаат министерските ресори, потврди досегашната министерка за одбрана Славјанка Петровска во Топ Тема на Телма.
Бидејќи, како што рече таа, според Уставот и Изборниот законик функцијата пратеник е неспоива со друга функција.
Нивните функции до изборот на нова влада ќе ги вршат замениците министри.
Дел од законодавната власт треба да станат и шестмина претставници на техничката извршна власт.
Покрај министрите Фатмир Битиќи, Илир Демири, Љупчо Николовски, Славјанка Петровска и Бисера Костадинова-Стојчевска и на техничкиот премиер Талат Џафери денеска треба да му биде конституиран пратеничкиот мандат.
Телма веќе објави дека претседателот на алтернатива Африм Гаши поднесе неотповиклива оставка од функцијата и од сите други партиски функции.
Според Уставот, претседателот на собранието не може да биде и претседател или функционер на политичка партија.
Гаши го овластил потпретседателот беким сали да ги извршува формалните обврски во партијата до изборот на нов претседател на партијата.
Алтернатива е дел од коалицијата Вреди, со која настапи заенички на изборите, и како што веќе објавивме, Гаши ќе биде претседател на собранието.
Во исто време, претседателот на движењето Беса и градоначалник на Тетово, Биљал Касами се откажува од пратеничкиот мандат. Тој до собранието достави изјава дека се откажува од пратеничкиот мандат и бара да не му биде верифивикуван мандатот. Касами беше кандидат за пратеник од коалицијата Вреди.