Градоначалничката на Град Скопје, Данела Арсовска му одговори на техничкиот премиер Талат Џафери за прозивката за неискосената трева во дворот на Владата.
„На денешната прес-конференција во Владата, в.д. премиерот Талат Џафери избегнува одговорност и манипулира со некакви процедури, само за него познати, лажејќи дека сопственост и надлежност на Град Скопје и ЈП „Паркови и зеленило“ било да се грижи за зеленилото во Влада“. Ако Талат Џафери досега не знае дека сам треба да си го уреди сопствениот двор, таа лекција ни денеска нема да ја научи сигурно. Од в.д. премиерот од Форино, што кога излегува од дома до Влада ги гаси попатно сите семафори и прави хаос низ градот, не е ни очекувано дека би требало да знае што е негова обврска, тој само знае какви бенефиции може да искористува“, возврати Арсовска.
Арсовска наведе дека ЈП „Паркови и зеленило” ги одржува градските булевари и паркови, површини кои се надлежност на претпријатието, согласно Закон.
„Ако в.д. премиерот Талат од Форино сака да ги ангажира да работат во Влада, за истото треба да си склучи Договор, исто како и секоја друга институција во Македонија“, вели Арсовска.
