Бостон се пласираше во полуфиналето од плеј-офот во Источната конференција во рамки на НБА-лигата. Селтикс славеа победа од 118-84 против Мајами за вкупни 4-1 во првата рунда. Џејлен Браун и Дерик Вајт со по 25 поени беа најефикасни кај домашните, додека во редовите на Хит најмногу се истакна Бам Адебајо со 23 поени. Мајами во оваа серија беше исклучително ослабен поради неиграњето на првата ѕвезда Џими Батлер, а повреден беше и Тери Розиер. Селтикс во полуфиналето ќе играат со подобриот од дуелот помеѓу Кливленд и Орландо, а Кавалирс имаат предност од 3-2.
Далас ги прегази Клиперс и тоа во Лос Анџелес со 93-123 за водство од 3-2 во Западната конференција. Лука Дончиќ имаше 35 поени, 10 асистенции и седум скока и беше најзаслужен за најубедливиот плеј-оф пораз во историјата на Клиперс. Макси Клебер имаше 15 поени, а Кајри Ирвинг 14. Кај поразениот тим не настапи повредениот Каваи Ленард, па Пол Џорџ и Ивица Зубац беа најефикасни со по 15 поени. Следниот натпревар се игра во Далас.