По денешните осминафинални пресметки на тенискиот турнир во Барселона, главните фаворити за трофејот Стефанос Циципас и Каспер Руд се пласираа меѓу најдобрите осум, но испадна Алекс де Минор.
Третиот носител на турнирот од серијата 500, Руд со 6-1 и 6-4 го победи Џордан Томсон. Норвежанецот во четвртфиналето ќе игра против Матео Арналди. Циципас пак го совлада Роберто Карбалјес-Баена со 7-5 и 6-3. Грчкиот тенисер, кој е петти фаворит за следен ривал го доби Факундо Дијаз-Акоста од Аргентина, кој во три сета го изненади Фабијан Марожан.
Најголемото изненадување денеска го приреди Артур Фис, кој го победи четвртиот фаворит Алекс де Минор со 7-5 и 6-2. Французинот во четвртфиналето ќе игра против Душан Лајовиќ, кој го елиминираше Алехандро Давидович-Фокина. Последната четвртфинална двојка е Камерон Нори против Томас Мартин Ечевери.