Бојан Јовановски побара од апелационите судии да ја укинат деветгодишната затворска казна за „Меѓународен сојуз“. Бара фер судење пред кривичниот суд за да ја докаже невиноста, но доколку одлучи Апелација ќе биде задоволен и да донесат мериторна ослободителна пресуда. Н
а јавната седница и тој и неговите адвокати понудија низа забелешки на првостепената пресуда, меѓу кои и тоа дека една од судијките не била изземена и покрај тоа што сама барала, затоа што имала оформено мислење за Боки 13 од предметот „Рекет“, каде што, исто така, била во судечкиот совет.
Одбраната ги уверуваше судиите и дека бизнисмените Силјан Мицевски и Ардијан Амзоски не биле оштетени.
Самите оштетени кажаа дека не се чувствуваат за измамени на главна расправа пред Кривичен суд. Не се оштетени, бидејќи немало умисла да бидат измамени или некој пак ги одржувал во заблуда. Пред сè, зборувам за мене, бидејќи целиот товар се става на мој грб. Целата постапка се водеше на нефер начин. Барам правда, не милост. Бев предвремено осуден, бидејќи во многу наврати и на многу рочишта беше истакнато од судијката дека нејзините одлуки ќе можеме да ги обжалиме пред повисоките судови. Тоа денес се случи. Беше прејудицирана таква пресуда и се знаеше тоа од првиот момент. Се надевам дека правдата ќе биде задоволена, а пред непристрасен суд да ја докажам мојата невиност, изјави обвинетиот Бојан Јовановски.
Јовановски до пред еден месец ја издржуваше деветгодишната казна за „Рекет“, но доби прекин поради здравствени проблеми со желудникот и тенките црева. Вели сега е на строг режим и сериозна терапија. Нема проблем со движење, но има моменти кога мора да мирува.
Првата слика на слобода не значела дека шета низ градот наместо да мирува.
Тоа е првата фотографија, откако излегов од болница. Мислам дека со поента и цел е објавена на моите социјални медиуми. Сепак јас сум личност која беше изложена на сериозна јавна тортура и линч сите овие години. Така што, тоа не е шетање. И повторно ќе кажам, мојата здравствена состојба е од друг карактер и тип, која е многу сериозна и се работи за траен инвалидитет, кој не е од физичка природа, или со физички видлив деформитет, вели Боки 13.
Ниту сум измамник, ниту сум перела пари, им рече на судиите обвинетата Јасна Ерцеговиќ која првично доби четири години затвор. За неа, вишиот обвинител Бурим Рустеми предложи да и биде прифатена жалбата само за делото измама, не и за перење пари.
За останатите обвинети, Рустеми предложи судот да им ги одбие жалбите, а на Фросина Ременски да и се потврди ослободителната пресуда. Тој тврдеше и дека аргументите на одбраната не важат и дека бизнисмените се оштетени, затоа што уплатиле парични средства, а судијката од кривичен не ни требало да се иззема.
На јавната седница беше присутна и обвинетата асистентка на Боки 13, Христина Блажевска која доби една година затвор, но не и неговиот татко кој доби условна осуда.
Елена Ивановска Мукоска