Пријава до обвинителството во Прилеп поднесоа родителите на новороденчето кое почина на Клиниката за детски болести во Скопје десет дена по раѓањето во прилепската болница. Се сомневаат дека напревани се пропусти при третманот на бебето и бараат да се утврдат причините за смртта.
Таткото во изјава за Телма тврди дека сите наоди на неговата сопруга во текот на бременоста беа уредни и отфрла било каква можност дека бактериска инфекција пренесена од мајката на бебето е причина за сепса со фатални последици. Од детската Клиника вчера соопштија дека кај бебето била изолирана фекалната бактерија ешерихија коли, а ќе се утврдува од што е предизвикана.
- Се беше исправно, сите испитувања за царски рез ги направи, беа исправни, докторката одлучи по природен пат да се породи. Немаше никаква бактерија. И кај матичниот гинеколог беше се во ред. Ова е тргагедија, ова е страшно. После ги предадовме сите документи во обвинителство, обвинителот ни зеде изјава и рече дека се ќе се испита, вели Славко Петрович, татко на починатото бебе.
Од Обвинителството за Телма потврдија дека се постапува по случајот.
- Основното јавно обвинителство Прилеп оформи предмет непосредно по настанот. Земен е исказ од мајката, а се очекува постапувањето и на надлежните органи кои вршат вонреден надзор во медицинските установи, по што ќе биде донесена одлука за натамошниот тек на постапката, соопштија од ЈОРМ.
Во меѓувреме и денеска продолжи вонредниот инспекциски надзор на Државниот здравствен и санитарен инспекторат во Прилепската болница кој започна вчера. Од таму за Телма потврдија дека се земаат изјави од медицинскиот персонал на двете одделенија, гинеколошкото и неонатологија, се проверува медицинската документација, протоколите за постапување со родилката и новороденчето, а на увид им се ставени резултатите од редовните анализи на брисови во овие болнички оддели, кои биле уредни.
Од државниот здравствен и санитарен инспекторат велат дека по сумирање на информациите за вонредниот надзор во двете здра вствени установи, деновиве ќе ја информираат јавноста за случајот во кој од сепса почина бебе на Клиниката за детски болести, донесено од прилепската болница во тешка здравствена состојба.
Емилија Мисирлиевски