Јоан Зарко ја запиша својата прва победа во кариерата во Мото ГП откако прв ја мина целта по драматичнот последен круг на трката за Големата награда на Австралија.
Мотоциклистот на Прамак Дукати имаше фантастични претекнувања во финишот на трката и заслужено се избори за победата и тоа пред светскиот шампион и лидер во генералниот пласман Франческо Бањаја на фабричкиот Дукати, а трет беше Фабио ди Џанантонио од Гресини за кого ова беше прв подиум во кариерата.
Бред Биндер финишираше четврти, а петти беше Хорхе Мартин, кој интересно беше лидер до последниот круг, кога беше престигнат од ривалите. Потоа следуваат Марко Бецеки, Џек Милер, Алеиш Еспаргаро и Алекс Маркез.
Во генералниот поредок, Бањаја на врвот има 366 бодови, Мартин е втор со 339, а Бецеки е трет со 293.
Интересно е тоа што за прв пат се возеше една трка во Мото ГП во сабота по 2015 година, најмногу поради непредвидливите временски услови во Австралија. Утре на програмата на патеката „Филип Ајленд“ ќе биде спринт трката.
Следниот викенд ќе се вози трката за Големата награда на Тајланд.