Јазикот на музиката не познава граници. Таа ја поседува неверојатната моќ да допре длабоко во нашите чувства, без разлика на припадноста, потеклото и верата и таму каде што завршува моќта на зборот, таму почнува нејзината моќ, вели легендарниот македонски композитор Љупчо Константинов, големиот мајстор на филмската и тетарска музика, годинашен добитник на државната награда „11 Октомври“ за животно дело во областа на културата и уметноста.
„Патот кој го минав до оваа свечена пригода беше долг и трнлив, не беше послан со персиски килими, туку со стотици табаци испишани нотна хартија и илјадници часови поминати во музичките студија во создавање музика за програмските потреби на Радиото, како и применета музика, мојата животна преокупација, музика наменета за театарската сцена, филмската уметност и телевизијата“, изјави Љупчо Константинов, добитник на наградата „11 Октомври“.
Филмската и театарската музика на Константинов за својата безвременост и уникатност е наградувана на многубројни фестивали, творештво кое е вброено во наше национално музичко богатство. Тој е автор на музиката за многубројни играни, документарни и анимирани филмови, ТВ-филмови, серии и драми, над 60 театарски претстави и автор на музиката за филмовите „Среќна нова 49“, „Македонска сага“, „Црвениот коњ“, „Тетовирање“, „Хај-фај“ и други.
„Во овие нешто повеќе од 50 изминати години имав можност да работам во голем број значајни проекти како во поранешните републики од некогашната заедничка држава, така и надвор од неа и имав чест и задоволство да запознаам голем број уметници од различни културни средини. Секој од нас во заедничката работа оставаше специфичен белег од милјето на културата на која и припаѓа. Богатство на разноликоста“, додаде Константинов.
Љупчо Константинов во 2019 година ја доби наградата „Голема ѕвезда“ на македонскиот филм на фестивалот „Браќа Манаки“ во Битола, а пролетва ја доби и наградата „Златен објектив“ за 2023 година, која ја доделува Кинотеката на Македонија.
Нина Стефанова